Бо ташаббуси шуъбаи Хадамоти муҳоҷират дар шаҳри Панҷакент дар Ҷамоати деҳоти Вору, деҳаи Зимтуд, вохӯрии иттилоотию маърифатӣ баргузор гардид. Дар чорабинӣ намояндагони сохторҳои дахлдори маҳаллӣ, фаъолон ва сокинони деҳа иштирок намуда, масъалаҳои вобаста ба муҳоҷирати меҳнатӣ, риояи қонунгузорӣ ҳангоми сафар ба хориҷи кишвар, пешгирии ҷинояткорӣ, нашъамандӣ, зӯроварӣ дар оила, савдои одамон, коррупсия ва дигар зуҳуроти номатлуб мавриди баррасӣ қарор гирифтанд.
Зимни мулоқот ба шаҳрвандон тавсия дода шуд, ки ҳангоми тасмим гирифтан барои сафар ба хориҷи кишвар пеш аз ҳама ҳуҷҷатҳои заруриро омода намуда, аз қонунҳо ва қоидаҳои кишвари қабулкунанда огоҳ бошанд. Ҳамчунин таъкид гардид, ки интихоби ҷойи кор бояд бо роҳи қонунӣ сурат гирифта, муносибатҳои меҳнатӣ ҳатман тавассути бастани шартномаи расмӣ ба роҳ монда шаванд.
Дар ҷараёни мулоқот намояндагони сохторҳои масъул бо сокинони деҳа суҳбати озоду судманд анҷом дода, доир ба як қатор масъалаҳои мубрами рӯз маълумоти зарурӣ пешниҳод намуданд. Аз ҷумла, таваҷҷуҳи иштирокчиён ба масъалаҳои муҳоҷирати меҳнатӣ, риояи тартиботи муқарраргардида ҳангоми сафар ба хориҷи кишвар, ҳифзи ҳуқуқу манфиатҳои шаҳрвандон, пешгирии ҷинояткорӣ ва дигар амалҳои зиддиқонунӣ ҷалб карда шуд. Дар идомаи вохӯрӣ масъалаи пешгирии шомилшавии ҷавонон ба гурӯҳҳои ифротию террористӣ низ мавриди таваҷҷуҳ қарор гирифт. Таъкид шуд, ки баланд бардоштани маърифати ҳуқуқӣ, истифодаи дурусти шабакаҳои иҷтимоӣ, зиракии сиёсӣ ва дурӣ ҷустан аз ақидаҳои ифротӣ яке аз омилҳои муҳими ҳифзи суботи ҷомеа мебошад.
Ҳамзамон, ба занону духтарон оид ба пешгирии зӯроварӣ дар оила, ҳимояи ҳуқуқу манфиатҳои онҳо ва зарурати муроҷиати саривақтӣ ба мақомоти дахлдор ҳангоми ба миён омадани мушкилот тавсияҳои зарурӣ дода шуданд.
Дар фарҷоми вохӯрӣ иштирокчиён ба риояи қонун, эҳтироми арзишҳои миллӣ, ҳифзи сулҳу субот ва масъулиятшиносӣ дар назди ҷомеа даъват гардиданд.
Масъулин изҳор доштанд, ки чунин суҳбату вохӯриҳои иттилоотию маърифатӣ дар маҳалҳо минбаъд низ идома ёфта, ҷиҳати баланд бардоштани сатҳи огоҳии аҳолӣ ва пешгирии зуҳуроти номатлуб чораҳои зарурӣ андешида мешаванд.
Маркази матбуоти Хадамоти муҳоҷират
