Кормандони Хадамоти муҳоҷират дар “Фурудгоҳи байналмилалии шаҳри Душанбе” вохӯрии навбатӣ бо шаҳрвандон – муҳоҷирони меҳнатӣ, ки барои фаъолияти меҳнатӣ ба Федератсияи Россия равонаанд, баргузор гардид.

Дар рафти вохӯрӣ бо шаҳрвандоне, ки барои фаъолияти меҳнатӣ ба Федератсияи Россия равонаанд, таъкид гардид, ки аз 1 октябри соли 2026 тартиби огоҳ намудани мақомоти ҳудудии Вазорати корҳои дохилии Федератсияи Россия оид ба анҷом додани фаъолияти меҳнатии шаҳрвандони хориҷӣ дар асоси иҷозатномаи фаъолияти меҳнатӣ (патент) тағийр меёбад.

Тибқи талаботи нав, тартиби пешниҳоди огоҳинома вобаста ба мақоми ҳуқуқии корфармо муайян карда мешавад. Агар муҳоҷири меҳнатӣ дар назди шахси воқеӣ кор кунад, ӯ вазифадор аст мустақилона, дар муҳлати ду моҳ аз рӯзи гирифтани патент, ба мақомоти ҳудудии Вазорати корҳои дохилии Федератсияи Россия оид ба фаъолияти меҳнатӣ огоҳинома пешниҳод намояд. Агар муҳоҷири меҳнатӣ дар назди шахси ҳуқуқӣ кор кунад, огоҳинома оид ба бастан ва қатъ намудани шартномаи меҳнатӣ танҳо аз ҷониби корфармо ба мақомоти ҳудудии Вазорати корҳои дохилии Федератсияи Россия дар муҳлати се рӯзи корӣ пешниҳод карда мешавад. Корфармоён бояд ба риояи муҳлати муқарраргардидаи пешниҳоди огоҳинома оид ба қатъ намудани шартномаи меҳнатӣ бо шаҳрванди хориҷӣ диққати ҷиддӣ диҳанд.

Барои сари вақт ба расмият даровардани муносибатҳои меҳнатӣ ва пешгирӣ намудани ҳолатҳои вайрон намудани қонунгузории муҳоҷирати Федератсияи Россия, аз шаҳрвандони Ҷумҳурии Тоҷикистон хоҳиш карда мешавад, ки ҳангоми ба кор қабул шудан ва қатъ намудани муносибатҳои меҳнатӣ бо корфармо тартиби огоҳ намудани мақомоти дахлдори Вазорати корҳои дохилии Федератсияи Россияро ба инобат гиранд.

Ҳамчунин ба маълумоти шаҳрвандони ҷумҳурӣ расониданием, ки дар Хадамоти муҳоҷират хати оҷилӣ (кол центр) фаъолият дорад, шаҳрвандон метавонанд бо рақами 900800800 дар тамос бошанд.

Маркази матбуоти Хадамоти муҳоҷират