Дар доираи тадбирҳои иттилоотию фаҳмондадиҳӣ ва бо мақсади баланд бардоштани маърифати ҳуқуқии шаҳрвандон, кормандони дастгоҳи марказии Хадамоти муҳоҷират, МД “Марказҳои машваратӣ ва омодагӣ пеш аз сафари муҳоҷирони меҳнатӣ” дар шаҳри Душанбе ва намояндаи Маркази захиравии муҳоҷирон ICMPD бо шаҳрвандон вохӯрӣ баргузор намуданд.
Чорабинии мазкур дар Маркази сершуғли муҳоҷират дар шаҳри Душанбе баргузор гардида, зимни он масъалаҳои марбут ба муҳоҷирати меҳнатӣ, риояи қонунгузорӣ ва омодагии шаҳрвандон пеш аз сафар ба хориҷи кишвар мавриди баррасӣ қарор гирифтанд.
Зимни вохӯрӣ ба иштирокчиён оид ба талаботи қонунгузории Ҷумҳурии Тоҷикистон ва кишварҳои қабулкунанда, тартиби будубош ва фаъолияти меҳнатӣ дар хориҷи кишвар, инчунин роҳҳои пешгирии ҳолатҳои номатлуб дар раванди муҳоҷират маълумоти зарурӣ пешниҳод карда шуд.
Таъкид гардид, ки донистан ва риоя намудани қонунгузории кишварҳои қабулкунанда, эҳтиром ба арзишҳои фарҳангиву иҷтимоӣ, доштани ҳуҷҷатҳои зарурӣ ва масъулияти шаҳрвандӣ аз омилҳои асосии таъмини амнияти муҳоҷирони меҳнатӣ ба ҳисоб меравад.
Ҳамзамон, ба масъалаҳои касбомӯзӣ, омӯзиши забонҳои хориҷӣ ва омодагии касбии шаҳрвандон таваҷҷуҳи махсус зоҳир карда шуд. Дар ин робита, ба шаҳрвандон иттилоъ дода шуд, ки дар назди МД “Марказҳои машваратӣ ва омодагӣ пеш аз сафари муҳоҷирони меҳнатӣ” дар шаҳри Душанбе омӯзиши забони русӣ ба таври ройгон ба роҳ монда шудааст.
Зикр гардид, ки шаҳрвандони хоҳишманд метавонанд аз ин имконият истифода намуда, донишу малакаи забонии худро такмил диҳанд. Омӯзиши забони русӣ, бахусус барои шаҳрвандоне, ки нияти сафар ба кишварҳои русзабон ва фаъолияти меҳнатӣ дар он ҷо доранд, яке аз омилҳои муҳими омодагӣ ба муҳоҷират мебошад.
Дар идомаи вохӯрӣ масъалаҳои пешгирии шомилшавии ҷавонон ба ҳизбу ҳаракатҳои ифротгаро, таҳкими худшиносиву худогоҳии миллӣ, баланд бардоштани маърифати сиёсиву ҳуқуқӣ ва риояи меъёрҳои қонунгузорӣ низ мавриди баррасӣ қарор гирифтанд.
Дар фарҷоми чорабинӣ иштирокчиён ба саволҳои худ посухҳои мушаххас гирифта, оид ба тартиби омодагӣ ба сафар, риояи қонунгузории кишварҳои қабулкунанда ва имкониятҳои мавҷудаи дастгириву машваратӣ маълумоти иловагӣ дарёфт намуданд.
Баргузории чунин вохӯриҳо ба баланд бардоштани сатҳи огоҳии шаҳрвандон, пешгирии ҳолатҳои номатлуб дар раванди муҳоҷирати меҳнатӣ ва ҳифзи ҳуқуқу манфиатҳои шаҳрвандони Ҷумҳурии Тоҷикистон мусоидат менамояд.
Маркази матбуоти Хадамоти муҳоҷират
