25 сентябри соли 2026 дар назди гулгашти ба номи Куйбешев, воқеъ дар хиёбони Рӯдакии ноҳияи Шоҳмансури шаҳри Душанбе, ярмаркаи ҷойҳои кории холӣ баргузор гардид.
Дар чорабинии мазкур кормандони дастгоҳи марказии Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон, Муассисаи давлатии «Марказҳои машваратӣ ва омодагӣ пеш аз сафари муҳоҷирони меҳнатӣ» дар шаҳри Душанбе ва раёсати Хадамоти муҳоҷират дар шаҳри Душанбе иштирок намуданд.
Ҳадафи асосии баргузории ярмарка фароҳам овардани имкониятҳои бештар барои бо ҷойи кор таъмин намудани шаҳрвандон, баланд бардоштани сатҳи огоҳии аҳолӣ оид ба бозори меҳнат ва пешниҳоди маълумоти зарурӣ дар самти фаъолияти меҳнатӣ дар дохил ва хориҷи кишвар мебошад.
Дар рафти ярмарка ба шаҳрвандон оид ба ҷойҳои кории холии пешниҳодшуда, имкониятҳои мавҷудаи шуғл ва тартиби дарёфти кори муносиб маълумоти муфассал пешниҳод карда шуд. Ҳамзамон, кормандони Хадамоти муҳоҷират ва марказҳои машваратӣ ба иштирокчиён оид ба масъалаҳои марбут ба муҳоҷирати меҳнатӣ, омодагӣ пеш аз сафар, риояи талаботи қонунгузории кишварҳои қабулкунанда ва зарурати огоҳии ҳуқуқӣ машваратҳои дахлдор пешниҳод намуданд.
Қобили зикр аст, ки яке аз самтҳои муҳими фаъолияти сохторҳои Хадамоти муҳоҷират баланд бардоштани сатҳи маърифати ҳуқуқӣ ва иттилоотии шаҳрвандоне мебошад, ки нияти сафар ба хориҷи кишвар бо мақсади фаъолияти меҳнатӣ доранд. Дар ин раванд ба омодагии пеш аз сафар, шиносоӣ бо ҳуқуқу уҳдадориҳои муҳоҷирони меҳнатӣ ва пешгирии ҳолатҳои номатлуб таваҷҷуҳи махсус зоҳир карда мешавад.
Баргузории чунин чорабиниҳо барои тавсеаи ҳамкории сохторҳои давлатӣ бо шаҳрвандон, мусоидат ба ҳалли масъалаҳои шуғл ва баланд бардоштани сатҳи огоҳии аҳолӣ аз имкониятҳои қонунии фаъолияти меҳнатӣ заминаи мусоид фароҳам меорад.
Хадамоти муҳоҷират минбаъд низ дар доираи ваколатҳои худ барои тақвияти корҳои иттилоотию машваратӣ, баланд бардоштани маърифати ҳуқуқии шаҳрвандон ва мусоидат ба ҳифзи ҳуқуқу манфиатҳои муҳоҷирони меҳнатӣ чораҳои заруриро амалӣ менамояд.
Маркази матбуоти Хадамоти муҳоҷират
