Дар ноҳияи Варзоб бахшида ба Рӯзи забони давлатии Ҷумҳурии Тоҷикистон тибқи Нақшаи чорабиниҳои Кумитаи иҷроияи Ҳизби Халқии Демократии Тоҷикистон дар ҳамбастагӣ бо намояндагии Ташкилоти ҷамъиятии ҷавонон “Созандагони Ватан” ва ташкилоти ибтидоии ҳизбии “Шуғл ва муҳоҷират” конфронси ноҳиявӣ таҳти унвони “Забони давлатӣ – пайвандгари наслҳо ва пояи миллат” таҳти Раёсати раиси Кумитаи иҷроия Қосимзода Маҳтоб Пир, намояндаи Кумитаи забон ва ислоҳоти назди Ҳукумати Ҷумҳурии Тоҷикистон Муҳамадёрзода Гулҷаҳон Муқим, мудири кафедраи робита бо ҷомеаи Донишгоҳи давлатии омӯзгории Тоҷикистон ба номи С. Айнӣ номзади илмҳои таърих Маҳмудов Давлатшоҳ, собиқадори меҳнат Имомалӣ Табарӣ ва раиси ташкилоти ибтидоии ҳизбии “Шуғл ва муҳоҷират” Олимзода Орифҷон Олим доир гардид, ки дар рафти он узви Кумитаи иҷроия, роҳбарон ва намояндагони ташкилотҳои ибтидоии ҳизбӣ, собиқадорони ҳизб, омӯзгорон ва дигар соҳаҳо иштирок намуданд.
Маврид ба зикр аст, ки дар конфронсияи мазкур баромадкунандагон доир ба гиромидошти забони давлатӣ баромадҳо намуда, ёдовар шуданд, кӣ: – яке аз дастовардҳои муҳими даврони соҳибистиқлолӣ қабули Қонуни Ҷумҳурии Тоҷикистон “Дар бораи забони давлатии Ҷумҳурии Тоҷикистон” мебошад, ки заминаҳои ҳуқуқии рушди забони давлатиро таҳким бахшид. Ин қонун мақоми ҳуқуқии забони давлатиро муайян намуда, истифодаи онро дар мақомоти давлатӣ, муассисаҳо ва дигар бахшҳои ҷомеа ба танзим медарорад;
– забон ва таърихи халқ бо ҳам алоқаи ногусастанӣ доранд, бахусус таърихи қадимаи халқи мо аз рӯи далелҳои забонӣ маънидод шудаанд. Чунончи забони тоҷикӣ василаи маҳфуз доштани мероси гаронбаҳои маънавии беш аз ҳазорсолаи халқи тоҷик мебошад. Ин забон дар таърихи тӯлонӣ дар муборизаҳо бо аҷнабиён ҳамеша муттаҳидгари халқи тоҷик буд ва дар он ҳофизаи халқ, ҷаҳони маънавӣ, меъёрҳои ахлоқии халқи тоҷик нигоҳ дошта шудааст; – забон яке аз муқаддастарин арзишҳои миллӣ ба шумор рафта, ҳастии ҳар миллат, ойинаи таърих, фарҳанг ва тамаддуни он мебошад. Барои миллати тоҷик забони тоҷикӣ на танҳо воситаи муошират, балки рукни асосии давлатдорӣ, ҳифзи ҳувияти миллӣ ва омили муҳими ваҳдати ҷомеа маҳсуб меёбад. Маҳз ба шарофати сиёсати хирадмандона ва таваҷҷуҳи пайвастаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар даврони соҳибистиқлолӣ мақому манзалати забони давлатӣ ба таври бесобиқа таҳким ёфта, барои рушду густариши он заминаҳои мусоид фароҳам оварда шуданд; – воқеан ҳам, забони ширину шевои тоҷикӣ дар ҷараёни рушду инкишофи худ аз замонҳои дури таърихӣ ҳамчун омили муҳимтарини муттаҳидкунанда, унсури ҳастӣ ва бақои умри миллати куҳанбунёди мо роҳи душвору пурпечутобро сипарӣ карда, дар замони муосир низ ба сифати яке аз пояҳои бунёдии давлатдорӣ дар таҳкими ваҳдату иттиҳоди аҳли ҷомеа хизмат мекунад. Аз ин рӯ, маҳз забони тоҷикӣ аз вуҷуд доштани миллати тоҷик дарак медиҳад ва ҳастии миллати тоҷикро дар олам бо номи Тоҷикистон муаррифӣ менамояд, зеро бо ин забон санадҳои ҳуқуқии байналмилалӣ ва осори илмиву адабии халқҳои ҷаҳон тарҷума мешаванд, созишномаҳо ва қарордодҳои муҳими байналмилалӣ таҳия мегарданд, аз минбарҳои бузургу мӯътабари ҷаҳон забони давлатии мо садо дода, дар сатҳи ҷаҳонӣ беш аз пеш маҳбубият касб менамояд. Ин моро водор месозад, ки ба забони худ арҷ гузорем ва барои рушду такомули он шароитҳои заруриро фароҳам оварем; – боиси ифтихор аст, ки мардуми хирадманду фарҳангдӯсти мо забони модарии хешро ҳамеша гиромӣ дошта, онро дар баробари дигар муқаддасоти миллӣ, хотираи таърихӣ ва нангу номус ҳифз мекунанд.
Маркази матбуоти Хадамоти муҳоҷират
